Hanga mahere mō ō mōkai me ērā atu kararehe
Ko ō kararehe ko tō takohanga. Me whakauru koe i a rātou ki tō whakamahere ohotata, ki tō whakariterite ohotata.
- Rokirokia kia rawaka te kai, te wai, me ngā rawa mō ō kararehe mō te toru rā, neke atu rānei. Kia maumahara ka inu ngā kararehe i te wai nui ake ina hēmanawa ana.
- Whakaritea kua whai mōtete whāiti ō mōkai. Rēhitatia rātou ki te New Zealand Companion Animal Register (NZCAR). Whakahou tonutia ēnei taipitopito, ā, whakaurua he taipitopito mō tētahi hoapā kei tētahi atu takiwā.
- Arotakehia tō kaupapa here inihua mōkai kia kite mēnā rānei e kapi ai ngā ohotata.
- Mēnā me whakatahi atu koe, kawea ō mōkai ki tō taha. Ki te kore e haumaru ana ki a koe, kāore i te haumaru ki a rātou. Whakaritea ka whakaaetia ō mōkai e tō wāhi whakatahi. Me whai taipitopito whakapā rānei mō ngā whare tiaki kurī, ngeru rānei, ngā mōtēra e pai ana ki ngā mōkai hoki.
Kei Te Manatū Ahu Matua (MPI) ngā kupu āwhina hei whakarite i tētahi mahere mō ō kararehe. Kei roto i tērā ko ngā rārangi mahi mō ngā tini momo kararehe, mō ngā tini momo ohotata hoki. Whāia ngā rārangi mahi hei whakawhanake i tō mahere.
Whakawhaiarotia tō mahere
Ina whakarite ana koe i tō mahere ā-kāinga, kia maumahara kia whai wāhi te katoa. Whakaarohia ngā matea o ngā tāngata hauā, o ngā kaumātua, o ngā pēpi, o ngā tamariki nohinohi, o ngā mōkai, o ērā atu kararehe anō hoki.
