Mā wai tēhea mahi i te ohotata

Ka mahi tahi ngā tini pokapū hei whakahaere i ngā ohotata, hei whakahaumaru i ngā tāngata. Akohia mā wai tēhea mahi i te ohotata.

Ngā Rōpū Whakahaere o Te Rākau Whakamarumaru

Ka whakahaeretia te nuinga o ngā ohotata paku e te ratonga ohotata hāngai. Hei tauira, ka whakahaeretia ngā ahi ā-whare e te Whakaratonga Iwi.

Kei Aotearoa hoki ngā pānga he paku ki te waenga te hōkai ka takea mai i ngā matepā māori pērā i ngā waipuke. Ka whakahaerehia ēnei e tō kaunihera ā-rohe, e ngā Rōpū Whakahaere o Te Rākau Whakamarumaru rānei. Kua hangaia ngā Rōpū Whakahaere o Te Rākau Whakamarumaru ki ngā kaunihera ā-tāone, ā-rohe ki tētahi takiwā.

Tekau mā ono ngā Rōpū Whakahaere o Te Rākau Whakamarumaru kei Aotearoa.

Atu i ngā ohotata, ka āwhina ngā Rōpū Whakahaere o Te Rākau Whakamarumaru ki te whakarite kia aumangea ake ngā hapori. Kei roto i tēnei:

• ko te mahi kia whakaheke i ngā mōrearea, i ngā matepā e pāngia ana e ngā hapori
• ko te whakamahere mō ngā urupare ohotata, ā,
• ko te ārahi i te haumanutanga ā muri i tētahi aituā nui.

He tata te mahi ngātahi a ngā Rōpū Whakahaere o Te Rākau Whakamarumaru:

• ki ngā ratonga ohotataki ngā tari kāwanatanga 
• ki ngā iwi
• ki ngā kaituku rawa waiwai pērā i te hiko, i ngā whakawhitinga kōrero, i te kapuni; ā,
• ki ētahi atu ka āwhina i ngā tāngata, i ngā hapori ki ngā urupare ohotata.

Kei ia Rōpū Whakahaere o Te Rākau Whakamarumaru tētahi Mahere Whakahaere Ohotata o Te Rākau Whakamarumaru. Me mātua whai te Mahere i ēnei:

• ko ēhea matepā, ko ēhea mōrearea ka whakahaerehia e te Rōpū Whakahaere o Te Rākau Whakamarumaru
• ka pēhea te whakahaere i ērā, ā,
• te whakamahere rautaki mō te haumanu i ngā matepā, i ngā mōrearea.

Te āhua o te ohotata ā-rohe

Ka hiahiatia e ētahi ohotata te pāhekoheko anō whakawhiti atu i ngā ratonga. Ki te pēnei, ka whakapuakitia pea tētahi wā ohotata ā-rohe. Ka tukuna e te wā ohotata ā-rohe ngā mana motuhake ki ngā Rōpū Whakahaere o Te Rākau Whakamarumaru ki te whakahaere i te ohotata.

Ka tukuna e te wā ohotata ā-rohe te whakahaeretia e ngā Rōpū Whakahaere o Te Rākau Whakamarumaru o te urupare ki te ohotata. Kei roto i tēnei:

• ko te ruruku i ērā atu ratonga ohotata
• ko te whakarite kia wātea mai te nōhanga taupua, te kai, te wai hoki
• ko te whakarite e tika ana te whakahaere i te āheinga ki ngā wāhi mōrearea, ā,
• ko te tuku i ngā karere mōhiohio tūmatanui auau.

I ētahi wā ka āwhina pea ngā Rōpū Whakahaere o Te Rākau Whakamarumaru ahakoa kāore i te whakapuakitia tētahi wā ohotata.

Tūohotata ā-motu

Mō ngā ohotata tino nui, ka āhei te Minita o Te Rākau Whakamarumaru te whakatau i tētahi tūohotata ā-motu. Ki te pēnei, ka mau i te Kaiwhakahaere o Te Rākau Whakamarumaru te mana whakahaere. Ka riro mā Te Rākau Whakamarumaru e whakahaere i te urupare.

Ngā wā whakawhiti

E tautoko ana ngā wā whakawhiti i tētahi whakawhitinga ngāwari mai i tētahi urupare ohotata ki te whakarauora mai i tētahi aituā ohotata. Ka taea te whakaara ngā wā whakawhiti ahakoa kua whakatauhia he tūohotata ā-motu, kāore rānei. 

Ka whiwhi Ngā Rōpū o Te Rākau Whakamarumaru i ngā tino mana i ngā wā whakawhiti hei āwhina i te wāhanga tuatahi o te whakarauora.

Te Rākau Whakamarumaru

Atu i ngā ohotata, ka whakatairangatia e Te Rākau Whakamarumaru te aumangea nui ake ki ngā aituā. Ka whakahaerehia hoki e ia te pūnaha whakahaere ohotata o Aotearoa. Ka whakaritea e ia e mahi ana te pūnaha e ai ki te tūmanako, ā, ka tautuhia ngā ara hei whakapai ake.

Ka tautokohia e Te Rākau Whakamarumaru te māramatanga, te pāhekoheko hoki ā-rohe, ā-takiwā, ā-motu hoki. Kei roto i tēnei ko te kāwanatanga, ngā iwi, te kāwanatanga ā-rohe, ngā whakahaere tūmataiti, hapori anō hoki.

Mā Te Rākau Whakamarumaru:

• e tautuhi ngā matepā, ngā mōrearea e hira ana ā-motu
• e tuku tohutohu ki ngā Rōpū Whakahaere o Te Rākau Whakamarumaru, ki ētahi atu hoki mō te whakahaere ohotata, ā,
• e aroturuki te ekenga o ngā Rōpū Whakahaere o Te Rākau Whakamarumaru.

Ngā Pokapū Rākau Whakamarumaru, ngā pokapū hapori me ngā marae

Ngā Pokapū Rākau Whakamarumaru

Ko ngā Pokapū Rākau Whakamarumaru (CDC) ngā wāhi haumaru i roto i ngā hapori e haere ai te tangata ki te tiki āwhina i te wā ohotata. E whakahaerehia ana ēnei e ngā kaimahi a Te Rākau Whakamarumaru me ngā kaitūao.

I tētahi ohotata, ki te kore e taea e koe te noho i te kāinga, i te taha o te whānau, ngā hoa rānei, ka āhei koe te whakatahi ki tētahi Pokapū Rākau Whakamarumaru. He rārangi tō ētahi wāhi i Aotearoa o ngā Pokapū Rākau Whakamarumaru i tā rātou paetukutuku. Ka whakatuwherahia e ētahi atu he Pokapū Rākau Whakamarumaru e ai ki te āhua o te ohotata.

I ētahi wāhi i Aotearoa, ka taea te kī ko te Pokapū Rākau Whakamarumaru he Pokapū Oranga, he Pokapū Ohotata Hapori rānei.

Ngā pokapū hapori

I te pokapū hapori, ka taea e koe te:

• Tono āwhina me te āwhina i ētahi atu mā te tuku i ō pūkenga me ō rawa ki tō hapori
• Tuku me te kimi mōhiohio kei te aha i tō rohe
• Tīmata ki te whakariterite i te whakapai i tō hapori. 

E whakahaerehia ana tō pokapū e ngā tāngata o tō hapori me te kore āwhina ōkawa. Kāore he putunga ō, he kai, he wai, he paraikete rānei i te mea kei roto kē ēnei i ō koutou ake kāinga me te hapori.

Ka taea e ngā pokapū hapori te mahi tahi me Ngā Rōpū o Te Rākau Whakamarumaru mō ngā tohutohu me ngā tautoko i mua, ā, i te wā hoki o ngā ohotata.

Ko ngā pokapū hapori ko ngā wāhi pērā ka tohua e te hapori i mua i tētahi ohotata. Ka whakatuwherahia rānei e ngā hapori me te whakahaere i tētahi pokapū hapori e ai ki te āhua o te ohotata.

Kāore ētahi hapori e whakamahi whare. Ka tuku kē i ngā tautoko mā ngā rōpū tāngata.

E ai ki te wāhi e noho ana koe, ka taea te kī ko te pokapū hapori he:

• Pokapū Hapori,
• Pokapū Ohotata Hapori,
• Pokapū Urupare Hapori,
• Pokapū Manaaki,
• Wāhi Whakataka.

Marae

Me kī ko te marae te wāhi e huihui ai ngā whānau me te hapori whānui i ngā wā o te raru. I ētahi wā ko ngā marae tonu ngā pokapū hapori.

He wāhanga hira tō ngā marae i te wā o tētahi ohotata. He wāhi ka tahuri hei pokapū hapori, e tuku ana i ngā ratonga waiwai pērā i te:

• kai,
• whakamarumaru, me te
• tiaki i ngā hapori Māori me te iwi whānui.

Ko tā ngā marae he tautoko, ā, wāhi haumaru hoki e whakatinanatia ai te manaakitanga me te kotahitanga i raro i ōna tikanga.