Matohi Waea Pūkoro Ohotata
Rapua ētahi atu mōhiohio e pā ana ki te Matohi Waea Pūkoro Ohotata. Mā ngā Matohi Waea Pūkoro Ohotata e haumaru ai te hunga. Ka pāhotia ngā matohi ki ngā waea e āhei ana mai i ētahi pourewa waea pūkoro.
Kei tēnei whārangi
Ngā whakamātau ā-motu
Whakamātautau ai mātou i te pūnaha Matohi Waea Pūkoro Ohotata i ia tau. He wāhanga hira tēnei o te whakarite e pai ana te mahi a te pūnaha.
Ako tonu mai mō ngā whakamātautau ā-motu o Matohi Waea Pūkoro Ohotata
Ngā waea whai āheinga me te whakatika raru
E whiwhi ai koe i ngā Matohi Waea Pūkoro Ohotata me whai waea e āhei ana te whiwhi i ērā. Me whai hoki tō waea i te irirangi waea pūkoro, me te pūmanawa kua whakahoungia. Ehara i te mea me tikiake koe i tētahi taupānga, me whakauru rānei ki tētahi ratonga.
Ko tā mātou e whakapae nei, ka whiwhi te nuinga o ngā waea hokona i muri mai i te 2017 i ngā Matohi Waea Pūkoro Ohotata.
Mō te Matohi Waea Pūkoro Ohotata
Ko ngā Matohi Waea Pūkoro Ohotata ētahi karere mō ngā ohotata. Ka tukuna e ngā pokapū ohotata whaimana ki ngā waea pūkoro.
Mā ngā Matohi Waea Pūkoro Ohotata e haumaru ai te tangata. Ka pāhotia atu ki ngā waea e āhei ana mai i ētahi pourewa waea pūkoro ki ngā wāhi e pāngia ana ki te mōrearea taumaha.
Kāore koe e whiwhi pea i te matohi mēnā kei tua koe i te awhe waea pūkoro, kua pakaru rānei ngā pourewa waea pūkoro, kua tūpono rānei te kotinga hiko.
E ai ki tā mātou uiuinga o 2022 mō te noho takatū ki te ohotata kua nui ake i te 88% o ngāi Aotearoa i whiwhi ai i te whakamātautau, i te noho tahi ai rānei ki tētahi i whiwhi ai i tērā. I te ohotata, ina whiwhi koe i tētahi matohi, kia kaha ki te whakamōhio atu ki ngā tāngata kei pātata ki a koe.
Ko Matohi Waea Pūkoro Ohotata tētahi hongere tāpiri kia noho haumaru ai koe hei te ohotata. Kāore tērā i te whakakapi i ērā atu pūnaha whakaaraara, i te matea rānei kia mahi i ngā mahi ā muri i ngā whakatūpato ā-taiao.
Ka whakaaturia pea e tō waea ētahi tautuhinga kōwhiringa e whakamahia ana ki whenua kē, engari ki Aotearoa ka whakamahia e mātou tētahi hongere pāpāho motuhake e kā ana i ngā wā katoa.
-
Ka tukuna anake ngā matohi mēnā he mōrearea taumaha ki te oranga, ki te hauora, ki te rawa rānei o te tangata. Waihoki, i ōna wā, hei whakamātautau. Hei tauira, ka whakamahia pea a Matohi Waea Pūkoro Ohotata hei whakatūpato i a koe ki ngā mōrearea taumaha pērā i:
- tētahi ngaru taitoko e pā ana ki ngā wāhi whenua
- tētahi ahi taikaha e pā ana ki ngā tāngata
- ngā hunga hara e huri haere ana, tērā rānei,
- te wai inu kua tāhawahawatia nuitia.
Kāore e whakamahia ngā Matohi Waea Pūkoro Ohotata mō te pānui hokohoko, mō ngā whakatairanga rānei.
-
Ko ngā pokapū ohotata whaimana anake ka taea te tuku i ngā Matohi Waea Pūkoro Ohotata. Ka tukuna anake ngā matohi mēnā he mōrearea taumaha ki te oranga, ki te hauora, ki te rawa rānei. Ka tukuna hoki pea e ngā pokapū ngā matohi whakamātau kua whakaritea.
Ko ngā pokapū anake e whakamanatia ana te tuku matohi atu ko:
- Ngā Pirihimana o Aotearoa
- Ratonga Iwi
- Te Manatū Hauora
- Te Manatū Ahu Matua
- Te Rākau Whakamarumaru
- Ngā Rōpū Whakahaere ā-rohe o Te Rākau Whakamarumaru.
Ka tautuhia e te karere matohi te pokapū e tuku ana i te Matohi Waea Pūkoro Ohotata.
-
Nō runga i te whakaaro ko tā Matohi Waea Pūkoro Ohotata he tiaki i a koe kia haumaru ai, tē taea te puta atu.
Kāore mātou i te hono atu ki ngā waea tauwhāiti, engari kē ka pāhotia ki tētahi rohe aronga e mōrearea ana. Koinei te take, tē taea te aukati i tō waea ake. Kāore a Matohi Waea Pūkoro Ohotata e whakamahi i tō tau waea pūkoro, e kohi rānei i ngā mōhiohio mōu.
Ka whakaatu mai pea tō waea i ngā tautuhinga kōwhiriwhiri nō tāwāhi kē. Heoi, kei Aotearoa nei ka whakamahia tētahi hongere whakapāho motuhake e noho kā tonu ana i ngā wā katoa.
Ki te kore koe e hiahia ki te whiwhi i te whakamātautau mō Matohi Waea Pūkoro Ohotata, me whakaweto tō waea, me huri rānei ki te aratau wakarererangi.
Tīkina ake tēnei pukameka e whakamārama ana i te pūnaha Matohi Waea Pūkoro Ohotata.
Te Whakahoki Kōrero mō Matohi Waea Pūkoro Ohotata
Ko te huarahi pai ake hei whakahoki kōrero mai mō Matohi Waea Pūkoro Ohotata ko te whakaoti i tā mātou uiuinga. Mā ngā mōhiohio ka kohia ki tēnei uiuinga mātou e āwhina kia whakapai tonu i te pūnaha.
Tukua mai ō whakahoki kōrero mō Matohi Waea Pūkoro Ohotata
Ētahi huarahi anō e noho mōhio tonu koe
Ehara i te mea ka whakakapi ngā Matohi Waea Pūkoro Ohotata i ērā atu matohi ohotata, i te matea rānei ki te mahi i ngā mahi ā muri i ngā whakatūpato ā-taiao.
Me whakarite tonu koe mō tētahi ohotata, ā, me kaua e tatari kia whiwhi i tētahi matohi ā mua i tō tū ki te mahi. Mēnā ki a koe e mōrearea ana tō oranga, kaua e tatari ki te whakatūpato ōkawa. Kia wawe te mahi i te mahi.
Whakaritea kei a koe tāu ake mahere ohotata kei roto ko ēnei:
- ngā mahi me mahi
- te wāhi me haere koe
- ko wai ngā tāngata hei tono āwhina, ā,
- ngā mea ko te tikanga e mataara ai koe.
Whakapā atu ki tō Rōpū Whakahaere ā-rohe o Te Rākau Whakamarumaru kia whai mōhio mō ērā atu pūnaha whakaaraara ki tō rohe.
Rapua tō Rōpū Whakahaere o Te Rākau Whakamarumaru (CDEM).
He mea nui kia mōhio ki ngā tini ara ka taea te rapu mōhiohio hei te wā o te ohotata.
Kia takatū
He mahi māmā ka taea e koe hei whakarite kua takatū koutou ko tō whānau kia puta atu.
