Te whakatika raru

He maha ngā pūtake kāore pea koe i whiwhi i tētahi karere Matohi Pūkoro Ohotata. E ākina ana te katoa e mātou kia whirinaki ki ngā tini ara kia whai mōhiohio.

Me tirotiro ka taea e tō waea te whiwhi Matohi Pūkoro Ohotata. Kei roto pea i ngā tautuhinga o tō waea ngā whakamārama. Ko tā mātou e whakapae nei, ka whiwhi te nuinga o ngā waea i hokona i muri mai i te 2017 i ngā Matohi Waea Pūkoro Ohotata.

Me whiwhi irirangi pūkoro tō waea, ā, kei te hou tonu te pūmanawa. Ehara i te mea me tikiake koe i tētahi taupānga, me whakauru rānei ki tētahi ratonga.

Ko ētahi atu pūtake pea kāore tō waea i te whiwhi matohi kei te:

• weto
• aratau rererangi
• kei waho i ngā ihirangi pūkoro,
• kāore i te tūhono rānei ki tētahi pourewa waea pūkoro.

Mēnā i nekehia tō waea i tētahi whatunga 3G ki te 4G i te wā o te pāhotanga, kua whiwhi koe i tētahi matohi mai i ngā whatunga e rua. Kua pēnei hoki mēnā i whakakā, i whakaweto hoki koe i te aratau rerenga. Mēnā rānei i whakaweto, i whakakā anō koe i tō waea i te wā o te pāhotanga.

Kei ētahi waea e kā ana tētahi āhuatanga whakamahara e taea ana te tautuhi mō ngā matohi. Mā tēnei pea e putuputu rawa ā te waea whakatangi mai hei te wā o te pāhotanga. Ki te whai tō waea i tētahi whakamahara matohi ka kitea tērā ki ngā tautuhinga o te waea. Ka tapaina pea ēnei tautuhinga ko ngā Matohi Ahokore, ko ngā Matohi Pāhotanga, ko ngā Matohi Ohotata rānei.

Mēnā i whiwhi koe i tētahi Matohi Waea Pūkoro Ohotata, ka kitea tonutia pea ki tō waea.

Mō ngā waea Android

He rerekē ia waea Android. Engari, e kitea noatia ana ngā matohi ohotata i roto i tō taupānga 'Messsages'.

Hei tauira, i te taupānga 'Google Messages':

1. Haere ki te taupānga 'Messages'.
2. Tirohia tō atahanga kīwhaiaro kei te taha matau o runga.
3. Tīpako 'Messages Settings'
4. Tīpako 'Advanced'
5. Tīpako 'Wireless emergency alerts'

Mō ngā waea Apple

Mō ngā kaiwhakamahi iPhone, kei ō whakamōhiotanga te matohi. Uru atu ki ō whakamōhiotanga mā te miri whakararo mai i runga i tō mata. Ki te muku koe i ō whakamōhiotanga, ka mukua hoki te matohi.

Kei te whakamahia e te pūnaha Matohi Waea Pūkoro Ohotata tētahi paerewa ā-ao. He nui te wā e kīia ana te hongere pāpāho e whakamahia ana e mātou te Presidential Alert kei tāwāhi.

Kua mahi tahi mātou ki ngā kaiwhakaputa waea, ki ngā kaiwhakahaere whatunga waea pūkoro hoki e whiua kē ai te rerenga Matohi Ohotata rānei. Heoi, ko ētahi waea ērā e whai tonu ana i te tikanga o Amerika, me te whakaatu mai nei i te rerenga Matohi Perehitene. Ka pēnā pea ina:

• hokona tō waea i mua atu i te 2017,
• tērā rānei i hokona tō waea i tāwāhi,
• tērā rānei i hokoroto whakararatia tō waea.

Kei te momo me te tauira o tō waea pūkoro te āhua o te āheinga ki ngā Matohi Waea Pūkoro Ohotata. Mēnā he taumatua rongo tōu, ka taea te whakariterite kia tangi te matohi mā tō taumatua rongo.

I ahu mai te tangi mō te Matohi Pūkoro Ohotata i tētahi paerewa ā-ao. Ahakoa pea he whakamataku, he hōhā rānei, i tohua kia aro atu koe i te mea kāore i te pai ki te taringa.

Ka taea Ngā Matohi Pūkoro Ohotata, pērā i ētahi atu matohi e whiwhi ana koe, te whakangū mā te pāwhiri i te pātene kahaoro o tō pūrere. Ki te pēhia e koe tētahi pātene kahaoro i te taenga mai o tētahi Matohi Pūkoro Ohotata, ka ngū te tangi. Ka noho tonu te katoa o te karere ki te mata hei pānui.

Ahakoa ka tangi tō waea pūkoro mō tētahi karere matohi kei te āhua o te momo me te tauira o tō waea. Kāore ētahi kaiwhakaputa waea e tuku kia takahia te aratau ngū e ngā matohi ohotata.

Ina taraiwa koe, me neke atu tō waka ki te taha o te rori, me hihira te karere ā te wā tonu ka haumaru ana te pērā. Mēnā he pāhihi kei tō waka, tonoa ia kia pānui tangetange i te matohi. Kaua e ngana ki te pānui i te matohi i a koe e taraiwa ana.

Me pai te mahi a te Matohi Waea Pūkoro Ohotata ki ngā wāhi whai whiwhinga irirangi waea pūkoro. Tata ki te 97% o ngā wāhi kei reira ngā tāngata e noho ana ka whai whiwhinga irirangi waea pūkoro. E whāia ana e ngā kaiwhakarato whatunga waea pūkoro te whakapai i te hōkaitanga pūkoro i ngā wā katoa.

Ka whakamahia e Matohi Waea Pūkoro Ohotata te irirangi waea pūkoro, ka mutu, kāore e whakapāho atu mā te waeatanga ahokore.

Ka whakamahi a Matohi Waea Pūkoro Ohotata i ngā whatunga waea pūkoro o Aotearoa. Ka taea anake te whakapāho i ngā matohi ki ngā waea pūkoro e āhei ana te whiwhi i ērā.

E whiwhi ai koe i tētahi Matohi Waea Pūkoro Ohotata me mātua whai irirangi waea pūkoro koe. I tēnei wā ka taea anake e Starlink te tuku tūhonohono ipurangi, kaua te irirangi waea pūkoro. E mōhio ana mātau kei te mahi a Starlink kia taea ai te ratonga waea pūkoro. E mōhio ana mātau ki tētahi atu kaiwhakarato amiorangi (Lynk World) e whakarato kē ana i tēnei.

He utukore te whiwhi i ngā Matohi Waea Pūkoro Ohotata. Kāore he utu ki a koe. Ehara i te mea me tikiake koe i tētahi taupānga, me whakauru rānei ki tētahi ratonga.