Pāheke, Hīpoki me Pupuri
Ko Pāheke, Hīpoki me Pupuri te mahi matua kia whakamahia e koe i te pānga mai o te rū whenua. Akohia te āhua o te Pāheke, Hīpoki me Pupuri.
Kei tēnei whārangi
Te āhua o te Pāheke, Hīpoki me Pupuri
Ko te āhuatanga pai rawa o Pāheke, Hīpoki me Pupuri te mea e tika ana mō tō tinana.
Me PĀHEKE ki ō ringaringa me ō pona, kia tino pāpaku rānei te tau ki raro. Mā konei e whakahaumaru i a koe i te hinga, engari ka wātea koe kia neke mēnā me pēnā. Me kaha whakawhirinaki ki tētahi pātū, he taonga ā-whare pakari rānei ki te kore e taea e koe te tau ki te papa.
HĪPOKI i tō upoko, i tō kakī (i tō tinana katoa mēnā ka taea) ki raro i tētahi tēpu mārō, i tētahi tēpu tuhi rānei (mēnā kei roto tonu i ētahi hīkoi noa mai i a koe). Ki te kore he whakaruruhau e tata ana, hīpokina tō upoko, tō kakī hoki ki ō ringaringa.
PUPURI tō whakaruruhau (i tō tūnga hei whakahaumaru i tō upoko, i tō kakī rānei) tae noa kia oti ai te rū. Mēnā ka whakanekehia tō whakaruruhau e te rū, me neke ngātahi atu.
Ngā āhuatanga rerekē o te Pāheke, Hīpoki me Pupuri
Mēnā he raruraru tō nekeneke, he whakamahi tiripou rānei
Mēnā he raruraru tō nekeneke, he whakamahi tiripou rānei, Pāheke, Hīpoki me Pupuri, me Noho, Hīpoki me Pupuri rānei
Me heke ki tērā ka taea e koe, me noho ki runga tūru rānei, ki te taha o te moenga, ki runga hopa rānei.
Me hīpoki i tō mahunga me tō kakī mā ngā ringaringa e rua. Kia kaha tonu te piko i tō tinana ki ō papa. He rite tēnei ki te tūranga whakamārō i runga waka rererangi. Kia mau tonu i tō tokotoko ki tō taha kia taea te whakamahi i tēnā ina mutu te rū.
Me pupuri kia mutu rā anō te rū.
Mēnā he whakamahi taumatua hīkoi koe, he kōrea rānei
Mēnā he whakamahi taumatua hīkoi koe, he kōrea rānei, Pāheke, Hīpoki me Pupuri.
Me raka ō wīra, ā, ka tāpapa ki raro rā anō.
Me hīpoki i tō mahunga me tō kakī mā ngā ringaringa e rua mēnā ka taea. Kia kaha tonu te piko i tō tinana ki ō papa. He rite tēnei ki te tūranga whakamārō i runga waka rererangi.
Me pupuri kia mutu rā anō te rū.
Mēnā kei te moenga koe
Mēnā kei te moenga koe, noho tonu ki te moenga, ā, uhia ngā hīti, ngā paraikete ki runga i a koe, whakamahia tō pera hei whakahaumaru i tō upoko, i tō kakī hoki.
He iti iho te tūpono ka whara koe mēnā ka noho tonu ki te moenga.
Mēnā kei waho koe i te whare
Mēnā kei waho koe i te whare, neke atu kia kaua e nui atu i ngā whetoko ruarua atu i ngā whare, i ngā rākau, i ngā rama tiriti, i ngā waea hiko, kātahi ka Pāheke, Hīpoki me Pupuri.
Mēnā kei tētahi ararewa koe
Mēnā kei tētahi ararewa koe, Pāheke, Hīpoki me Pupuri.
Ina mutu te rū, ngana kia puta atu ki te papa tino tata mēnā e haumaru ana kia pēnā.
Mēnā e taraiwa ana koe
Mēnā e taraiwa ana koe, neke atu ki tētahi wāhi wātea. Whakatūria te waka.
Tatari ki reira, kia mau tonu tō tātua here tūru tae rā anō kia mutu te rū.
Ina mutu te rū, āta haere i runga i te mataara, ā, āraitia ngā piriti, ngā rōnaki rānei nā te mea kua whakakinotia pea.
Me whakangungu i tō Pāheke, Hīpoki me Pupuri
He mea nui te whakangungu i ngā mahi tika mō te tūpono pā mai o tētahi rū, ka mōhio koe me aha.
Ko te pūtake o te nuinga o ngā wharanga me ngā matenga i ngā rū nā te takanga o ngā mea ki runga i te tangata, kaua ko te papahoro o ngā whare. Me whakangungu koe i te āhuatanga o te PĀHEKE, HĪPOKI ME PUPURI e pai ana ki a koe, kia tere tonu ai tō whai i tērā ina rū te whenua.
Ko te āhuatanga pai rawa o Pāheke, Hīpoki me Pupuri te mea e tika ana mō tō tinana, ā, i whakangungua hoki e koe.
Me whakangungu i tō Pāheke, Hīpoki me Pupuri:
- i ia tau i roto i te New Zealand ShakeOut
- ina tirotiro koe i tō mahere, ō putunga ohotata
- i ngā wā auau o te tau pērā i te tō a Māui.
Ngā mōhiohio haumaru mō te rū kei te hē
Ka kite koe i ētahi atu mōhiohio i runga ipurangi me aha koe ina rū ana. Kua whakahētia te nuinga, nō reira kaua e whai.
E tautoko ana ngā rangahau o Amerika, Taiwana, Hapanihi me Aotearoa i te Pāheke, Hīpoki me Pupuri. He whenua katoa ēnei e ū ana ki ngā tikanga hou, hoahoa ārai rū, hoki.
Ngā Rauemi
Akohia te take ko Pāheke, Hīpoki me Pupuri te mahi tika kia whakamahia i te pānga mai o te rū whenua ki tēnei pukameka reo Pākehā.
Akohia me aha koe hei te rū whenua ki ngā tini horopaki. Mātakitakihia ēnei kiriata haumaru rū whenua ki te reo Pākehā nā te Southern California Earthquake Center.
Ko Pāheke, Hīpoki me Pupuri te mahi matua kia whakamahia e koe i te pānga mai o te rū whenua. Mātakitakihia tēnei kiriata poto ki te reo Pākehā kia whai mōhio mō te Pāheke, Hīpoki me Pupuri.
Tīkina ake me te tā i tēnei pānui whakaahua. Whakairia ki tō kāinga, ki tō kura, ki tō mahi, ki tō wāhi hapori rānei. Kia maumahara: Pāheke, Hīpoki me Pupuri.
Tīkina ake, tiria hoki tēnei pukameka mō ngā mahi me whakamahi ā mua, ā roto, ā muri hoki i tētahi rū whenua.
Ngā momo matepā
He maha ngā matepā māori kei Aotearoa. Akohia me aha ā mua, ā roto, ā muri hoki i ia momo ohotata.
