Te tiaki pēpi me ngā kōhungahunga i te wā ohotata
Ka hiahia ngā pēpi rātou ko ngā tamariki nohinohi ki te manaakitanga, ki te aronga motuhake hei te ohotata. Whai mōhio he aha ka taea e koe hei tiaki i a rātou.
Kei tēnei whārangi
Te tiaki i ngā pēpi hei te ohotata
He nui ake te mōrearea ka tauraki, ka whakapokea rānei ngā pēpi. Ka hiahia rātou ki te manaakitanga, ki te aronga motuhake hei te ohotata.
Hei te ohotata, ka kati pea ngā huarahi, ngā toa hoki mō ngā rā e toru, neke atu rānei. Me whai rawa koe kia puta atu tō pēpi.
- Ngā kope porowhiu
- Ngā muku pēpi
- Te patuero ā-ringa pūtake-waiwaihā
- Ngā pēke rāpihi mō ngā kope paru
- Ngā rongoā, ngā pani ka hiahiatia e tō pēpi
- Ngā karapu porowhiu
- Ngā kākahu tuwhene, tētahi paraikete, tētahi taonga tākaro motuhake rānei
Whakaritea he rawa mā tō pēpi kei tētahi pēke nanao, kei wawe tō wehe atu i te kāinga.
Mēnā he auau te noho a tō pēpi ki te taha o te whānau, o ngā kaitiaki rānei, me whai rawa ohotata ki ō rātou kāinga hoki, hei tāpiri atu ki tō kāinga.
I te wā o te ohotata ka kokotia te ao o ia rā, ā, me wehe pea ngā tāngata i ō rātou kāinga. He uaua pea tēnei ki ngā whaea, ki ngā tāngata e tiaki pēpi ana.
Kei Te Whatu Ora ngā kupu āwhina mō te whāngai i tō pēpi hei te ohotata mō ngā pēpi whāngai ū, mō ngā pēpi whāngai miraka kua hokona hoki.
Te tiaki i ngā tamariki nohinohi hei te ohotata
Ka taea te whakauru i ngā tamariki nohinohi ki te mahi whakamahere mō te ohotata mā te tuku i ngā mahi paku ki a rātou hei whakamahi. Hei tauira, tonoa rātou ki te hihira i te rā kei tō wai rokiroki, te whakamātau rānei mēnā e kā ana te rama.
Kōrero atu ki a rātou i runga i te āhua pono, engari kaua i te āhua whakamataku, mō:
- ngā āhuatanga ka pā pea hei te ohotata
- tā koutou e taea ai kia noho haumaru tonu, ā,
- tā koutou mahere ki te kore e taea te hoki ki te kāinga.
He mea āwhina pea tēnei kia whakaheke i te mataku, i te āwangawanga, ā, he mea āwhina hoki kia mōhiotia e te katoa me pēhea te urupare.
Ka nui ake tā rātou whai wāhitanga, ka iti iho tō rātou mataku hei te wā ka pā te ohotata.
Whakaritea he rawa mā ngā tamariki nohinohi kei tētahi pēke nanao kei wawe tā koutou wehe atu i te kāinga. Me whai ēnei i te pēke nanao, ngā kākahu mahana, te wai, ngā paramanawa, tētahi taonga tākaro makau, tētahi kēmu makau rānei kia noho tāuteute rātou.
Kei ngā tamariki ō rātou ake āhua o te aro atu ki te whētuki e ai ki te wā o te whanaketanga. Kei te Manatū Hauora ngā aratohu mō te āwhina i ngā tamariki ki te aro ki te whētuki.
Whakawhaiarotia tō mahere
Ina whakarite ana koe i tō mahere ā-kāinga, kia maumahara kia whai wāhi te katoa. Whakaarohia ngā matea o ngā tāngata hauā, o ngā kaumātua, o ngā pēpi, o ngā tamariki nohinohi, o ngā mōkai, o ērā atu kararehe anō hoki.
