Me whakarite mahere mō ō kararehe
Ko ō kararehe ko tō takohanga. Me whakauru koe i a rātou ki tō whakamahere ohotata, ki tō whakariterite ohotata.
- Rokirokia kia rawaka te kai, te wai, me ngā rawa mō ō kararehe mō te toru rā, neke atu rānei. Kia maumahara ka inu ngā kararehe i te wai nui ake ina hēmanawa ana.
- Whakaritea kua whai mōtete whāiti ō mōkai. Me rēhita ki tō rata kararehe me te New Zealand Companion Animal Register (NZCAR). Me whakahou haere aua taipitopito me te whakauru i tētahi tangata whakapā kei waho o te rohe.
- Arotakehia tō kaupapa here inihua mōkai kia kite mēnā rānei e kapi ai ngā ohotata.
- Mēnā ka mate koe ki te whakatahi, me heri i ō kararehe āwhina me ō mōkai. Ki te kore e haumaru ana ki a koe, kāore i te haumaru ki a rātou. Whakaritea ka whakaaetia ō mōkai e tō wāhi whakatahi. Me whai rānei i ngā taipitopito whakapā mō ngā wāhi tiaki kurī, poti, me ngā mōtera pai mō te mōkai.
Kei Te Manatū Ahu Matua (MPI) ngā kupu āwhina hei whakarite i tētahi mahere mō ō kararehe. Kei roto i tērā ko ngā rārangi mahi mō ngā tini momo kararehe, mō ngā tini momo ohotata hoki. Whāia ngā rārangi mahi hei whakawhanake i tō mahere.
Ngā kararehe āwhina
E whakangungua ana, e whakamanatia ana hoki ngā kararehe āwhina e tētahi whakahaere. He tuku i ngā ratonga hira pērā i te tuku whakatūpato, te tuku tautoko hoki. E āhei ana i raro i te ture ki ngā wāhi tūmatanui. Me whiwhi whakaae pea koe hei kuhu ki tētahi marae, whare karakia rānei.
I raro i te ture, tē taea te wehe i a koe mai i tō kurī āwhina/ārahi. Arā, pērā i ngā wāhi tuku tautoko i tētahi ohotata, pērā i Ngā Pokapū Rākau Whakamarumaru.
Ka tukuna e te whakahaere whakamana i tō kurī tētahi koti hei mau mā tō kurī kei runga ko te ingoa o te whakahaere me tētahi whakaaturanga tuakiri mōu. Ka āwhina tēnei kia tere te tūhono anō i a koe ki tō kurī ki te wehe koe i tō kurī.
Me mātua whakarite kei te mau tō kurī i tana koti, he tuakiri rānei mēnā ka taea. Ehara i te mea me whai tuakiri hei tautoko, hei uru rānei i tētahi Pokapū Rākau Whakamarumaru.
Me mātua whakarite koe kei a koe tō kāri tuakiri kararehe āwhina me tētahi momo tuakiri tuarua pērā i tētahi reta mai i tō whakahaere mēnā ka taea.
Me tono ki tō whakahaere whakamana me pēhea te whakapā atu ki a rātou whai muri i tētahi ohotata, ā, he aha ngā tautoko e tukuna ana e rātou.
Me mātua whakarite he whakaahua tōu i te taha o tō kurī mō te tūpono ka wehe kōrua.
Whakawhaiarotia tō mahere
Ina whakarite ana koe i tō mahere ā-kāinga, kia maumahara kia whai wāhi te katoa. Whakaarohia ngā matea o ngā tāngata hauā, o ngā kaumātua, o ngā pēpi, o ngā tamariki nohinohi, o ngā mōkai, o ērā atu kararehe anō hoki.
